قلشنا وهزرنا علي الفوضي اللي حصلت في الربيع الامريكي... نقعد بقي ونتكلم كلمتين بهدوء مع فنجانيين قهوة يعدلوا المزاج

اللي بيحصل في امريكا هيخلص... وترامب هيمشي... وبيضون هيتنصب... وهتبقي توتة توتة فرغت الحدوتة... بس المهم ايه هيه الدروس المستفادة لينا احنا كمصريين

اول درس

احنا مش شعوب همجية ولا غوغائية... احنا شعوب زي أي شعوب... فينا الصالح وفينا الطالح... فينا الملتزم بالقانون وفينا الفوضوي العشوائي... واعتقد منظر الشعب الامريكي الكيوت وهو بيسرق المحلات في احداث انتخابات 2016 و مظاهرات حياة السود مهمة واحداث امبارح واقتحام الكونجرس بملابس القرون الوسطي بتقولنا اننا يجب ان نتوقف علي تحقير انفسنا... يجب ان نتوقف عن الدونية وجلد الذات

ثاني درس

تدخل المال السياسي وتبرعات رجال الاعمال امر معتاد في سير اي انتخابات... ولما نعرف ان تكلفة الانتخابات الرئاسية وانتخابات الكونجرس الأمريكي في 2020 وصلت إلى 14 مليار دولار... ويعتبر بايضون أول مرشح في التاريخ الأمريكي يجمع مليار دولار... وترامب جمع حوالي 600 مليون دولار وفقاً للبيانات المعلنة

لقد تم توزيع البيتزا والرشاوي الانتخابية وصناديق الاكل وبفيديوهات لمواطنين امريكان... ده غير تبرعات كبار رجال الاعمال... يبقي ياريت نبطل نتكلم عن تاثير المال السياسي... ولا انت فاكر الشركات الكبيرة دي ورجال الاعمال دول بيمولوا ليه... عشان مصالحهم والتأثير علي القوانين والقرار السياسي قولا واحدا

ثالث درس

مافيش حاجة اسمها انتخابات حرة ونزيهة... عشان نزيهة انتحرت... وده كان واضح تماما في انتخابات 2020... ترامب الرئيس الامريكي اللي علي راس السلطة اتهم الديمقراطيين بالتزوير وبسرقة الانتخابات حتي وإن لم يسانده القضاء الامريكي... ورافض للنهاردة الاعتراف بهزيمته وتسليم السلطة سلميا... لتنهار اسطورة امريكا بلد الحريات وتبادل السلطة والبلا بلا بلا

رابع درس

مافيش حاجة اسمها حريات حين تتعارض مع الامن القومي والمصالح العليا للبلاد ويعتبر تدخل قوات الامن بالقوة والعنف والغازات المسيلة للدموع لقمع الفوضي شرعيا ومطلوبا... واعتقد تدخل قوات الامن لاخماد ثورة وفوضي وعنف انصار كلينتون بعد فوز ترامب في 2016 اكبر دليل... وثورة الملونين في 2019 بعد مقتل جورج فلويد دليل آخر... وحاليا مظاهرات انصار ترامب واقتحام الكونجرس احدث وآخر دليل

خامس درس

مافيش حاجة اسمها اعلام حر الا في احلام المراهقين السياسيين... واللي بيحصل علي قنوات CNN و Fox news اكبر دليل... الاولي كانت بتكسر في ترامب من يوم ماتسلم السلطة في 2016 لحد امبارح وتهدف اسقاطه... والفوكس نيوز منحازة للجمهوريين علي طول الخط... ويضيع حق المواطن العادي الغير منتمي لحزبي الفيل والحمار وآخر همهم مصلحة الوطن العليا

سادس درس

فاضل بس نتكلم عن الفساد والظلم... وانا مش هكلمك عنهم... انا بس هطلب منك تدخل علي نيتفليكس وتتفرج علي الاعمال الوثائقية اللي بتوثق كافة انواع الظلم اللي بيقع علي الفقراء والغلابة والسود والطرمخة للاغنياء من قبل رجال الشرطة وتتفرج علي تدليس الادلة الجنائية وفساد نظام المحلفين في القضاء الامريكي

ارفع راسك ايها المواطن المصري... بلدنا جميلة وتاريخها حضاري وعريق وماشية وبتتطور في الطريق الصحيح... وكفاية تسمع للدونيين والقذريين اللي لسة عايشين في الحلم الامريكي اللي قلب كابوس

بس كده